فضفضة النهارده هما كلمتين محشورين في زوري الحقيقة ....فضفضة النهاردة بدايتها إعلان في التلفزيون... لكن المشكلة أو بمعنى أدق الكارثة مش المنتج المعلن عنه الكارثة الإعلان معمول إزاي !!!
جايبين تلت أطفال ولاد وداخل عليهم طفلة ... أول ما التلت أطفال بيشوفوا الطفلة بتجيلهم حالة من الذهول وكأنهم رجالة في منطقة عشوائية وكأن دا الأسلوب الأمثل للراجل لما يشوف ست !!!
الإعلان ما وقفش علي كدا ... أبسليوتلي ... الطفلة لما دخلت طفل من التلت أطفال قال في كل أنبهار ومسك إيدوا وكأنه معلم مخضرم ... فكهاني وبحب الفاكهة فالطفلة ترد عليه بيئة أوي ... يقوم الطفل التاني يقول ...دي أحلى من الدندو ... وطبعا الحدق يفهم إيه هو الدندو ... تقوم إيه الطفلة تتعوج عوجه ولا فتيات الليل وتقول دا ماله دا !!!... الطفل اللي بعده بنظرات الذئب يقولها غشيم أصل أول مرة يشوف بنت ... قوم إيه الطفل التالت يقول ياااكي يا بنت .... هو الحقيقه أنا مش عارفه يعني إيه ياااكي ومش هسأل لإنه أكيد هي لا تقل في المعني عن الدندو ... هو الإعلان وقف لكدا؟ ... لأ طبعا . ودي تيجي ، طفل رد عليها بنظرات ذئباوية وقالها سيبك منهم أصلي أنا زهقت من القاعدة الناشفة دي ... وبكدا خلص الاعلان
ردود أفعال الناس بين المؤيد والمعارض واللي بيقول إعلان ظريف
الإعلان دا قنبلة موقوتة ... في نظرية في التسويق بتقولك لنجاح تسويق منتج إخلق حواليه جدال علشان يتعرف وينجح ؟!
لكن الجدال اللي هيتخلق دا هيتخلق على حساب مين ؟!
مين اللي هيدفع الحساب يا محترمين ؟!
جيل كامل ... هسمع حد بيقولي والنبي ياأخت إنتي ما تكبريش المواضيع
والله ياأستاذنا أنا مش بكبر المواضيع ... لكن أنتم اللي بترجعوا تعيطوا وتقولوا التحرش ... وقلة الأدب اللي في الشوارع ... والألفاظ الخارجة والإنحطاط الفكري ويطلع كام برنامج يسترزقوا علي البوقين دول ... كيفية مواجهة الإنحراف الفكري والسلوكي داخل المجتمع ... ويجيبولهم كام أخصائي لزوم المنظرة يقولوا كلام منمق وفي الأخر يبقى الحال كما هو عليه .... عايز إيه من طفل شايف الطبيعي في الإعلان إنه يبص علي البنت إنها حتة طرية ... وإنه يقول الألفاظ اللى مش هي دى ... الطفل دا لما هيكبر طباعه هتبقى إزاي بالميت لو ربنا كرمه هيطلع متحرش لفظي قد الدنيا ...
الموضوع بجد بسيط ... بس منشتكيش من جيل إحنا اللي بندمره
منلومش علي جيل إحنا اللي دخلنا في دماغه أفكار منحرفة
منعبش عليهم علشان إحنا مكناش أصلا قدوه كويسة ليهم
كله من عمل إيدينا ورغم كدا بنتصدم ونقول هو ماله الزمن والجيل والدنيا ... الدنيا دي إحنا اللي قاعدين فيها وإحنا اللي بنخربها أو بنعمرها
ليا فضفضاية أخيرة :
ياإعلام ... يا أب ... يا أم ... يااااااا مدرسة ... إرحموا الجيل اللي طالع لأنه أمالنا كله عليه ... متحطموش أخر أمل