واصل الإعلامي الساخر، باسم يوسف، الدفاع عن نفسه حول اتهام جماعة الإخوان له بأنه لن يجرأ على السخرية او الشماته على الشهداء، قائلا:" الاخوان هما اللي شمتوا فيا يوم وفاة أمى".

ونشر يوسف تغريدة عبر صفحته الشخصية على موقع التواصل الإجتماعي "الفيس بوك" قال فيها : "حاجة اخيرة عشان اقفل موضوع الاخوان ده خالص لان الكلام فيه معاهم مش بيجيب نتيجة عشان بس اثبت ان الموضوع و لا له علاقة بأغنية و لا حلقة".

وأضاف:"رابعة كانت ١٤ اغسطس. البرنامج رجع ٢٥ أكتوبر .. الاخوان هاجموني من بعد تلاتين ستة وروجوا لنفس الكلام بتاع "انت مسئول عن الدم و دم النشهداء في رقبتك " قبل الحلقة ما تطلع أصلا بشهرين و اكتر. و بالرغم من مقالاتي في الشروق في اغسطس و سبتمبر اللي إعلاميين النظام هاجموني عشانها و اللي هاجمت فيها الفض و القتل و الدم (بس ماحدش بيقرا)" .

وتابع:"لما امي ماتت في سبتمبر قبل رجوع البرنامج بخمسة و اربعين يوم شمتوا فيا و في موت امي قبل ظهور الحلقة خالص. و كان تشفي غريب و انتقام و فرحة في موت والدتي بطريقة مسعورة، بل و فضلوا يدعوا على بنتي اللي عمرها ساعتها كان اقل من تلات سنين، و دعوا على اهل بيتي عشان بس تعرفوا ان الموضوع و لا أغنية و لا نيلة".

وأستطرد قائلاً: :"تكرر الموضوع بعد وقاة والدي برضة.. و الكلام ده مستمر لغاية دلوقتي.. اي حد يتسجن من النشطاء لمجرد انه هاجم مرسي قبل كده بيتم الشماتة فيه و بيفرحوا فيه من غير ما يعمل برنامج او اغنية عشان يفضلوا هما بس ليهم الحق الحصري في النضال و الشهادة" .

واوضح يوسف: "لما كتبت البوست اللي فات توقعت ان الهجوم بتاعهم مش حيختلف، نفس الجمل المحفوظة اللي ما اتغيرتش، و لا كأنهم قروا حاجة. انا كتبته للناس اللي بتتأثر بابتزازهم و ضغطهم النفسي عليهم و تحميل كل الناس ماعدا هما ذنب اللي حصل لان زي ماقلت في بداية البوست اللي فات السبب اني كتبت برضة انهم مصرين يرازوا فينا و يحملوا الناس الذنب و يحطوا اتهاماتهم لاي حد في جملة مفيدة".

وأختتم تغريدته قائلا:"في النهاية، و دي اخر مرة اتكلم في الموضوع ده، انا قلت قبل كده قلت ان استحالة اشمت في اموات و لا اعمل حاجة بالشكل ده و شرحت في البوست اللي فات انه ده سوء الفهم تخريج بره السياق، ..ربنا يرحم امواتنا جميعا . ربنا يرحم الجميع المحبوس و الميت و المعتقل".