جريدة تحيا مصر

اخر الأخبار

الصحة

د/ إيهاب محمد عبد المعطي

د/ إيهاب محمد عبد المعطي

نصائح لكل أم ربنا رزقها بـ"طفل" جديد

الأحد 18/فبراير/2018 - 10:02 م
طباعة
- رضعى طبيعى اول 6 شهور من غير اى اضافات 
-بلاش اعشاب ولا بيبى درينك 
بلاش جلوكوز عشان الصفرا ولا بعدالولاده
- ڤيتامين "د" من أول يوم ٤ نقط ڤي دروب
- تطعيم ڤيروس بي أول ٢٤ ساعة حتى في أيام الجمع و العطلات الرسمية .. في الوحدات الصحية و أقسام النساء في المستشفيات الحكومية
- ما تربطيش حاجة على السرة
- ممنوع الحفاضة تغطي السرة
- نظفي السرة بالكحول بعد كل غيار.
- رضعي طبيعي ..بس
- بلاش بيبي درينك..اتمنع من وزارة الصحة
- تحليل الكعب من اليوم الثالث للسابع يوم السبت و الثلاثاء في كل الوحدات الصحية..
- حديث الولادة إنسان و بيحتاج النظافة ..و بيستحمى عادي على الاقل مرة واحدة في اليوم
- ممنوع بوس الطفل من الفم
- بلاش بوس أحسن ..بينقل أمراض
- تطعيم الدرن "حقنة الكتف" ..في أول 15 يوم ما تتأخريش
- مفيش في السبوع غربلة ..الغربلة=نزيف في المخ
- تكحيل الطفل بالبصل ممنوع..عينه هتضيع
- نقط مطهرة للعين روتين في أول أسبوع
- أورق مهمه: كراسة التطعيمات..منحنيات النمو تشمل الوزن و الطول و محيط الرأس
- وزن طفلك ساعة الولادة ..احفظيه، الطبيعي من ٢.٥ الى 4 كيلوجرام و بيخس 10%بعد الولادة و بيرجع لوزن الولادة عند اسبوعين . في المتوسط بيزيد ٧٥٠ جم أول شهر
- ٦٠٪ من المواليد بيصفروا ..صفرا طبيعية حميدة ما تقلقيش.
- الصفرا عايزة رضاعة و متابعة أو حضانة و علاج ضوئي مش عايزة نيون و لا ڤيتامين
- المولود إنسان ..إحساسه بالجو زينا..بلاش بطاطين في أغسطس ..هيفطس
- الزغطة و الخنفرة و الحزقة ظواهر طبيعية هتقل مع الوقت
- ظواهر تقلقك : الطفل رافض الرضاعة أو مش قادر يرضع ، لونه بيزرق، نفسه فيه نهجان ، مدروخ و مش بيصحى
- اهتمي بنفسك و صحتك عشان تقدري تهتمي بمولودك..كلي أكل صحي و متوازن ، بلاش أدوية من غير داعي، اشربي كل ماتعطشي، و بلاش اكل حراق أو بيعمل انتفاخات كلي 3 وجبات رءيسية و وجبتين خفيفتين
- حديث الولادة بينام كتير بس متقطع..نومك هيتلخبط ..بترضعي و تغيري و تدلعي و تنيمي
- حديث الولادة بيسمع من و هو جنين ف اخر شهور الحمل..لو مفيش فزع أو خضة من الصوت العالي تقلقي
- لازم طفلك يعمل براز في أول ٢٤ ساعة ..لو معملش استشيري الطبيب
- أنماط الإخراج مختلفة عند حديثي الولادة..فيه طفل بعد كل رضعة يعمل براز و طفل يعمل مرة كل 5 ايام
- النوم على البطن ممنوع . .
- غيري الحفاض من ٣_٤ مرات يوميا و نشفي كويس. و سيبيه متعرض للهوا شويه.
- لو بنت اتأكدي من وجود فتحة المهبل..لو ولد حسي الخصيتين و شوفي فتحة القضيب في مكانها و لا لأ..
- طفلك بيعيط كتير ..عليكي تخمني السبب و مع الوقت هتفهميه
جعان _رضعيه ،، شبعان و منفوخ _كرعيه،، عنده مغص دلكيه ،، عايز حد يشيله شيليه ..ما تسيبيش طفلك يعيط عشان ما يتعودش على الشيل..هو إنسان و عايز اهتمام و الاهتمام ما بيطلبش
- السخونية و الكحة في حديثي الولادة مش طبيعية و مش حميدة ..لازم دكتور و تحاليل.
- حبي طفلك ..ولد أو بنت..أسمر أو ابيض ..سليم أو مريض ..ده قطعة من روحك ما تخليش حد أبدا يصنفه
- مع نهاية الشهر التاني الطفل بيبدأ يبتسم لو لاعبتيه ..لو بيعيط و اتكلمتي معاه هيهدأ ..
اتعاملي معاه على إنه إنسان محتاج غذاء و حب و عناية
-اهتمى بالتطعيمات الخارجيه مهمه خصوصا الروتا عشان النزلات المعويه والمكورات عشان الالتهاب الرئوى 
حافظى على ابنك وريحى بالك

إرسل لصديق

تصويت

شارك بإستطلاع تحيا مصر : من هو أفضل إعلامي رياضي لعام 2017 ؟

شارك بإستطلاع تحيا مصر : من هو أفضل إعلامي رياضي لعام 2017 ؟

تابعنا على فيسبوك

تابعنا على تويتر

ads