شـــكـــر واجـــب للشاعر رمزي بشارة لشهداء البطرسية
الأربعاء 28/ديسمبر/2016 - 12:06 م
طباعة
ta7ya-masr.com/263040
شكر واجب
للي شاجب واللي داين
واللي جيه الموقع يعاين
واللي بالبنط العريض
قال قتيل ومش شهيد
واللي دم الناس عليه
كان رخيص جداً وهاين
للي مش عايز يفكر
إيه يخلي ناس تفجر
الكنايس والكماين
للي سايب في المدارس
منهج إزاي تبقى خاين
للي في فـ قلبه مَعَزَّة
وإللي جالنا بنفسه عزَّى
واللي قال دول خلق كافرة
كفرهم للكل باين
واللي قال لا يجوز عليهم
أي رحمة أو حداد
دُوله عُبَّاد الصليب
دوله صليبيين جُداد
للي قال إنجيل مُحَرَّف
واللي قال للنار وقود
واللي قال عبدوا تلاته
رغم إن هو واحد -
- بس . ليه كل السجود
للي قال إن إحنا قلنا
ربنا اتخذ له صاحبة
شكر خاص للمتخلف
اللي قال إن إحنا نؤمن
إن سبحانه وتعالى
ربنا اتجوز وخلف !
للي فوق كرامتنا دايس
وبغباء وبأنزحة
وبثقة قال الكنايس
جوه منْها أسلحة
للي قال فـ الفتحة أصلاً
النصارى المقصودين
اليهود مغضوب عليهم
وإحنا ضالين مخدوعين
شكر واجب ..
للي رغم إن البلد دي
حبها مش حب نزوة
وإننا فـ الأصل منْها
مش فتحناها بغزوة
قالوا إن الباب يفوِّت
١٠٠ جَمل
لو ماكانشي الحال ده عاجب
شكر واجب ..
للي قالوا كلام يموِّت
الأمل
لما قالوا الدين مراتب
للي قالوا هُمَّ أعلى
وإحنا عين وهُمَّ حاجب
شكر واجب للي رافض
يبني بين الموت وبيننا
أي ساتر .. أي حاجب
السؤال .. لإمتى هافضل
كل يوم والتاني كاتب
شكر واجب للشاعر رمزي بشارة