مثل قديم ولما حد بيسمعه الأيام دي... بيضحك ويقول لا الإبن بيتربى ولا الراجل بيتعود!
- الله... إزاي بس لا الإبن بيتربى ولا الراجل بيتعود ؟! دي كارثة
- أه والله زي ما بقولك كدا الستات تعبت لإن العيال... المدرسة والشارع هما اللي بيربوهم... والراجل أمه بتبقى مربياه وجاى لمراته جاهز واللي كان كان
- الله يعني الراجل كان طفل وأمه اللي ربته وعودته ؟!
- مممممممم
- من غير مممممم تعالي هنا... إنتي اللي قولتيلي مش أنا
-أنا عارفه بقى هما اللي كانوا بيقولولنا كدا
- هي دي الزتونة... هما اللي قالولي... هما مين بقى؟!
- ممممممم... هما... أهالينا
- إنتي مقتنعة بالكلام اللي ملهوش معنى دا؟!
- ماهو أنا شايفة قدامي إبني مجنني ومش بيسمع الكلام وجوزي تعبني برضه
- علشان إنتي حافظة مش فاهمة... أخدتي الكلام من ماما وتيزه وصاحبتك وبنت خالتك وبنت الجيران اللي هما أصلا جايبين الكلام دا من ناس تانية والناس التانية جايبينه من ناس تانية وهكذا لحد ما توصل لأصل الحكاية من قديم الأزل إن كان في واحدة عندها مشكلة أو منفسنة أو خايفة من الحسد.... لكن مش دي الحقيقة خالص...
الحقيقة إن إبنك تقدري تربيه كويس وبالأصول وجوزك تقدري تعوديه علي الأصول مش تعوديه علي طبعك اه ( كلام ماما وكده يعني) المهم ما علينا... لو كل ست ربت إبنها بما يرضي الله... على إن الله محبة وإن أقصر طريق هو الخط المستقيم... والصح صح والغلط عمره ما كان نسبي... إحنا اللي حطينا النسبة والتناسب لكن الحقيقة الصح والغلط محدش بيختلف عليه...
الإبن دا هيكبر وهيتجوز ومش هيتعب مراته... هيقولوا عليه ونعم التربية تسلم اللي ربت ملك بن أميرة... ولحد لما دا يحصل وكل أم تنتبه يعني إيه تربية سليمة...
التربية السليمة مش إن إبنك يكون قاعد في وسط ناس مؤدب أدب القرود ولا يكون شاطر وبس...
التربية السليمة إنه يفهم دينه صح... إنك تسمعيه لما يقول رأيه... يبقى صاحب قرار وحلم... إنك لما تقوليله... لأ... تقوليله قولتي لأ ليه وتقنعيه وتسمعيه... تعليمه إن الست نص المجتمع اللي بيبني ويعلم النص التاني مش مجرد كمالة عدد... إن مش من الرجولة إنك تلعب ببنات الناس ولا الرجولة إنك تمشي مع نص بنات البلد ،عوديه يفكر... يشغل مخه...
لحد ما دا يحصل... وربنا كرمك وإتجوزتي إعرفي إنك مش داخلة خناقة وإنك لازم تعوديه علي طبعك... لأ إنتي هتعوديه علي الأصول والصح... تحترميه هتجبريه إنه يحترمك... شجعيه علي النجاح هيقدرك... إديله رسايل غيرمباشرة إن ربنا دايما شايفنا... هيخاف يبص علي أي بنت لكن خوف مش منك خوف من ربنا اللي أقوى منك ومنه... صلي قدامه هيتكسف وهيتغير وهيصلي... أوعي تديله الأمان لحد ما يحكيلك وبعدين تديله بشبشب زيكو... وحبي نفسك وشكلك وأهتمي بيها علشان هو يحب نفسك وشكلك ويهتم بيها... وبلاش حركات الستات... عايزه جوزك ميهتمش بنفسه خايفة عليه يتسرق... صدقيني مافيش راجل بيتسرق... إهتمي بشكله وبمنظره علشانك إنتي وعلشان هو يفرح بيكي إنك عايزاه أحسن الناس شكلا وموضوعا...