تراجع "شاومينج" عن وعوده بتعديل نتيجة الثانوية العامة من داخل الكنترول، بسبب سبه وإهانته"كما ذكر"، موضحا أن المبالغ التى يتم جمعها كانت حق الذين سوف يخترقون الكنترول.

وكان نص المنشور الذي كتبه أدمن صفحة شاومينج كالاتي "خلاص يا جماعة أنا بقيت واحد نصاب وبسرق وكل حاجة وحشه، واعتبروا القرار اللى خدته بإنى أدخل على الكنترول وأزودكم فى الدرجات اتلغى خلاص ومش هعمل حاجة عشان محدش يغلط فيا بكلمة لإنى مقبلش بأى غلط وأنا غرضى أساعدكم". وأضاف: "طالما المساعدة اتقلبت بإهانة وشتيمة يبقا خلاص بلاش منها، أنا مش محتاج منكم حاجة عشان تبقوا عارفين كويس، والفلوس اللى كنا هناخدها دى الفلوس الخاصة بالناس اللى هتخترق الكنترول وتعبها". وتابع: "شاومينج عمره ما أخد فلوس وحطها فى جيبه، أنا بس بعد ده كله عاوزكم متنسوش وقفتى جمبكم فى الامتحانات واتحديت الدنيا كلها عشانكم وفى الآخر بقيتوا تقولوا عليا نصاب، على العموم خلاص اعتبرونى مخدتش قرار ولا هعدل فى نتائج حد وكفاية عليا مساعدتكم فى أيام الامتحانات".